Aukageturæði

Ég er farinn að hallast því að það sé réttast að leggja bara niður embætti forsætisráðherra. Forseti getur gegnt störfum hans. Hann er persónukjörinn og situr ekki á þingi og þannig fengist betri aðgreining ríkisvaldsins en nú er sem og aukið lýðræði. Í því kerfi sem við búum við nú er framkvæmdarvaldið hluti af löggjafarvaldinu og hefur um leið heljartök á því en er samt ekki beint kosið af neinum; við kjósum til þings en ríkisstjórnin, handhafi framkvæmdarvaldsins, verður síðan til nánast eins og aukageta með smá hjálp frá forseta (nema hvað þessi aukageta hefur áhrif á undirstöðuna sem réttnefnd aukageta gæti ekki).

Ef við hefðum annars vegar persónukjörinn forseta sem færi fyrir utanþingsstjórn og hins vegar þjóðkjörið þing óháð forseta og ráðherrum má vera að flokksræðið myndi minnka aðeins. Eða hvað? Það yrðu a.m.k. ekki stjórnarkreppur af því tagi sem við þekkjum, því það væri ekkert stjórnarsamstarf. Um leið væri þá ekki hægt að kenna samstarfsflokknum um það sem miður fer. Svo gæti forseti vísað málum til þjóðaratkvæðagreiðslu og þannig haft hemil á þinginu og þingmeirihluti lýst yfir vantrausti á forseta og þannig losað okkur við vanhæfa forseta og vanhæfar ríkisstjórnir.

Sound good to anyone?