Jólaáform

Í dag keypti ég miða heim um jólin, já eða að minnsta kosti frá Bandaríkjunum. Það lítur ekki út fyrir að ég komi aftur heim til Íslands fyrr en í fyrsta lagi næsta vor. Í ár held ég hins vegar jólin í Noregi. Ég held að þetta verði fyrstu jólin síðan 1978 sem ég held ekki á Íslandi og þar sem ég var of ungur til að muna eftir fyrstu jólunum mínum í Noregi árið sem ég fæddist, þá verður þetta ný reynsla fyrir mig. Það er nú alltaf gaman að upplifa eitthvað nýtt, ekki satt?

Það er búið að vera leiðinlegt veður í allan dag, rok og hellidemba (en samt er hlýtt og í raun bara peysuveður). Ég vona að þetta fari nú að skána.

Við Valla vorum boðin í mat hjá nokkrum öðrum stúdentum í gær og það er gaman að segja frá því að matarboðið jók á sjálfstraust okkar Valgerðar í eldhúsinu. Við erum bara alls ekki svo slæm eftir allt, þótt ég fyrir mitt leyti eigi enn margt ólært.