Þekkingarmiðlun

Ég var að komast að því að það er til íslenskt fyrirtæki sem heitir Platon.is í höfuðið á gríska heimspekingnum Platoni og er ráðgjafafyrirtæki "á sviði viðskiptagreindar". Á heimasíðunni kemur fram að fyrirtækið bjóði m.a. upp á þekkingarmiðlun. Þar er líka að finna stutta kynningu á Platoni sem á væntanlega að útskýra nafn fyrirtækisins. Í kynningunni stendur: "Í einu af hans þekktasta riti, Ríkinu, lýsir Platon því yfir að þekking sé ekkert annað en rökstudd skoðun og segir söguna af hellinum máli sínu til stuðnings". Já, ég skil, þeir taka sem sagt að sér að miðla "þekkingu" á hlutum sem þeir hafa ekki kynnt sér. Fyrirtak!

Það virðist raunar vera í tísku þessa dagana að rangtúlka Platon og eigna honum einhverja vitleysu og meira að segja hið lærðasta fólk tekur þátt í því.